Aqroparklar innovativ texnologiyalar əsasında rəqabətqabiliyyətli məhsul istehsalını və sahibkarlığı dəstəkləyərək, qeyri-neft sektorunun inkişafına, investisiya mühitinin yaxşılaşdırılmasına və əhalinin məşğulluğunun artırılmasına şərait yaradır.

Səlahiyyətli orqanın qərarı ilə aqroparkın yaradılması və fəaliyyətinin təşkili dövlət büdcəsinin vəsaiti, idarəedici təşkilatın əldə etdiyi gəlirlər və qanunla qadağan olunmayan digər mənbələr hesabına, özəl aqroparkın yaradılması və fəaliyyətinin təşkili isə rezidentin (rezidentlərin) vəsaiti və qanunla qadağan olunmayan digər mənbələr hesabına maliyyələşdirilir.

Aqropark dövlət, bələdiyyələr və sahibkarlıq subyektləri tərəfindən dövlət, bələdiyyə və xüsusi mülkiyyətdə olan torpaqlarda yaradılır. Aqropark üçün nəzərdə tutulan dövlət mülkiyyətində olan torpaq sahəsi idarəedici təşkilatın daimi istifadəsinə həmin torpaq sahəsini icarəyə vermək hüququ ilə ayrılır. Aqroparkın fəaliyyətinə xüsusi və bələdiyyə mülkiyyətində olan torpaq sahələri Azərbaycan Respublikasının torpaq qanunvericiliyinə uyğun olaraq bağlanılan icarə və ya alqı-satqı müqavilələri əsasında cəlb edilir.